Día das Letras Galegas: "En galego falo, en galego sinto..."

    Este ano imos a celebrar o Día das letras Galegas dunha forma un chisco especial, xa que fixemos un poemario galego entre todos/as, recitando pequenos versos das obras de escritoras e escritores galegos como Rosalía de Castro, Manuel María, Curros Enríquez, máis tamén do autor homenaxeado este ano Ricardo Carvalho Calero.

    

    Aquí vos deixo o noso Gran poemario Galego, sen vós, non sería posible. Grazas! Feliz Día das Letras Galegas!

Día da Familia: 15 de maio

    O 15 de Maio celébrase o Día das familias e...as abelliñas non podíamos faltar a esta data, porque tratamos moitas veces este tema na clase e xa sabemos que...hai familias dun pai e unha nai, de dúas nais, de dous pais, só dun pai ou dunha nai, tamén hainas de tres ou catro membros e aqueloutras nas que os avós e avoas, son parte fundamental do día a día. Por todo isto, hoxe quixemos celebrar o seu día debuxando as nosas familias e creando para elas unhas flores un chisco atípicas.

    Unha vez máis e...desta vez, dunha forma moi especial, quixeramos darlles as grazas aos papás, mamás, avós, irmáns...que nos axudaron neste proceso e nos axudan, todos os días, a medrar felices ao seu carón.

Día do Libro: Hoxe escribimos nós!

    Hoxe celebramos o Día do Libro e que mellor maneira de facelo que...deixando voar a nosa imaxinación e convertirnos en grandes escritoras e escritores por un día. Así pois, inventamos as nosas propias historias e démoslles un formato un pouco especial, xa que compuxemos con varios hexágonos unha rosa, a flor máis característica destas datas.

      En todo este proceso, tamén foron parte fundamental as familias, polo que vos agradecemos moito o tempo que dedicastedes a motivarnos para que as nosas historias quedasen aínda máis fermosas. Sen vós, non sería posible. Grazas!

Este é o Universo que nos rodea

    Este trimestre estivemos a investigar, coa axuda das familias, todo o relacionado co Universo, ese gran espazo apenas coñecido.

    No seguinte vídeo, podedes ver unha pequena mostra de todas as actividades que fixemos, comezando coas notas para as familias escritas por nós, nas cales fumos concretando a temática sobre a cal queriamos aprender, mais isto non quedou aquí, posto que dos contos e de toda a información que trouxemos á aula, fumos collendo a que consideramos esencial, aprendendo a centrarnos na fundamental, por medio de debuxos ou ben lendo pequenas palabras ou frases, os maiores.

    Os temas sobre os cales investigamos foron os cohetes, xa que construimos o noso propio e mesmo o fixemos voar; os planetas, elaborando o Sistema Solar, profundizando no nome dos planetas, na súa orde, nas súas características máis salientables, nos movementos que fan ao redor do sol, de onde xurde a noite e o día no noso planeta Terra; estrelas, concretando os seus nomes e a súa forma, xa que cosimos as nosas propias constelacións e "atrapamos" a nosa galaxia nun bote que trouxemos da casa.

    Este foi un proxecto co cal non puidemos continuar debido á situación de emerxencia sanitaria que vivimos polo COVID-19, xa que non tiñamos todos os materiais que precisamos para seguir a investigar como nos gustaría.

Felices 5 anos Aleix!

8M: Día da Muller traballadora

  Hoxe, celebramos o día da muller traballadora no cole con disversas actividades.

    Unha delas foi un teatro de sombras María a Pirata, da man de Luis, o noso guía na excursión de Cortegada, o cal recoñeceron moi rapidamente os nenos e nenas de 5 anos, sen dúbida deixou neles unha gran pegada, xa que cando o coñeceron tiñan 3 aniños.

    Outra das actividades que realizamos foi un xogo na PDI, na que tiñamos que ubicar distintos elementos, os cales simbolizaban oficios, xogos... en tres columnas, segundo se traten de algo "típico" de homes, de mulleres ou de ambos.

   Logo levamos este xogo ao papel, xa que tiñamos que sacar dun bote diversas imaxes similares ás da PDI e debuxar nun A3 se o soen facer os homes, as mulleres ou os dous.

   Desta forma, comprobamos como todos eses traballos, xoguetes, deportes... o podiamos facer tanto homes como mulleres.

    Finalmente, inventamos unha historia empregando os cubos tránslucidos, na cal a protagonista sería unha muller e tentamos romper certos mitos existentes sempre nos contos, princesas que precisan dun príncipe, os cabaleiros son os únicos valentes, etc.

   

O ENTROIDO xa está aquí!

    Un ano máis, celebramos o Entroido temático no cole, esta vez, relacionado coa conservación do Medio ambiente, xa que temos sempre moi presente o noso proxecto da Bizoecoloxía.

    Para isto, estivemos uns días investigando na rede sobre posibles disfraces, para ter unha idea e logo elixir entre diversas propostas, dándolle certa unidade á clase, para que houbese certa similitude e ao mesmo tempo cada un co seu toque persoal, mais tentando usar sempre materiais de refugallo.

    Así pois, este foi o resultado, no cal se viu á gran implicación das familias, polo que vos damos as grazas polo voso esforzo para facer deste, un gran día.

Teatro O LOBO E A LÚA

    Hoxe fumos de excursión a Pontevedra a ver a obra de teatro da Fundación Abanca, a cal imos todos os anos, pero esta vez...fumos dunha forma un pouco especial, xa que...ao cadradar coa semana das ordes do Meco, optamos por cumplilas e ir en pixama, sen dúbida foi un atuendo que non pasou desapercibido.

    Para rematar a visita, fumos a merendar ao parque da Alameda e compartimos grandes momentos de xogo cos nosos compañeiros/as de 1º que tanto estamos a botar de menos.

Coas Mates disfrutando!

    Sempre se tivo a imaxe das matemáticas como "algo" difícil de comprender, por ser abstractas, por non entender á perfección todos os seus mecanismos e operacións, pero máis ben...débese a que dende pequenos amosáronolas como algo mecánico, sen comprender o que estabamos a facer, tan so executando o que se nos pedían nos "problemas" dunha forma repetitiva ata que o "sabiamos" facer.

Así pois, este curso, ao igual que os anteriores continuaremos a aprender mates "xogando", descubrindo dunha forma manipulativa todo isto que considerábamos complexo por non poder investigalo coas nosas mans.

Aquí vos deixamos unha pequena mostra dalgúns xogos que estivemos a facer este trimestre, cos cales aprendedemos, sen darnos conta, a facer equivalencias, comparacións, o doble ou a metade dunha cantidade, o conteo de forma ascendente e descendente, pequenas operacións lóxicas, etc.

Felices 6 anos Noa!

Día da Paz: Jacqueline Evans

    Para celebrar o Día da Paz, este ano investigamos sobre as aportacións dunha muller ao coidado do medio ambiente, en concreto á conservación do mundo mariño das Illas de Cooks, lugar no que naceu. Esta muller trátase de Jacqueline Evans. A continuación, amosámosvos o resultado de investigación sobre as grandes accións que a levaron a conseguir o premio Goldman, o Nobel Verde en 2019, así como o proceso de elaboración do noso paraugas, o cal empregamos para realizar a nosa exposición aos alumnos de 1º de Primaria.

Entra o Inverno e nós...aprendendo!

    Como estamos a aprender sobre o Inverno, tiñamos que dar cabida ás froitas típicas desta época, xa que...sen querelo, estamos a experimentar co gusto, cos sabores e texturas, ademais de comer dunha forma saudable.

Isto non é todo, xa que tamén deixamos un oco para ser grandes artistas de novo, facendo copos de neve sobre cartulinas negras e empregando un útil que poucas veces usamos, os xices de cores, en concreto, aquelas típicas do inverno (azuis, violeta, blanco...)

Novo recanto de contos!

    Estes días chegou unha nova sorpresa á nosa aula, polo que...como grandes manitas que somos...puxémonos mans á obra coa súa montaxe.
    Trátase dun caixón transportable, grazas ás súas rodas, no cal gardaremos a gran maioría de contos, xa que colocaremos unha pequena selección nun andel que estea á nosa altura, así podemos liberar un pouco a nosa estantería da aula e enchela de xogos de lectoescritura máis manipulativos que sen dúbida imos a desfrutar moito.

    

Bizoecoloxía: Reciclamos o plástico

   Hoxe aproveitamos o bo tempo para ir ao contedor do lixo a reciclar as botellas de plástico que nos sobraron de facer as zanfoñas para o festival de Nadal.
    Desta forma, estiramos as pernas, ao mesmo tempo que coidamos o medio ambiente ao descubrir, dunha forma máis vivencial que na aula, as cores dos contedores e o que temos que botar en cada un deles. Aspectos, que traballamos todos os días de forma inconsciente na hora da merenda ao depositar na papeleira correspondente aos restos ou envases, mais serviunos esta andaina para afondar no aprendido, recordarllo a quen non tiña tan claro...

Xogamos nos recantos

    As seguintes imaxes amosan grandes momentos de xogo libre nos recantos, mais non se queda só niso, senón que tamén destaca a aprendizaxe grupal, a cooperación e colaboración entre os nenos e nenas máis maiores e os pequenos, así como a inventiva nas construccións das vías ou sendo grandes cociñeiros e cociñeiras.

Por outra banda, tamén deixamos un oco para os novos xogos deste curso, uns que deixen voar máis a nosa imaxinación, sen ser tan estructurados, nin ter unha función clara e ademais, están feitos con materiais naturais. Sen dúbida espérannos moitas horas de diversión e aprendizaxe nestes recantos.

Felices 4 anos Candela!

Felices 6 anos Julia!